|
Den politiske organiseringa av Sogn og Fjordane fylkeskommune er forutan fylkestinget og fylkesutvalet, samansett av tre hovudutval og kontrollutvalet.
Fylkestinget er det øvste folkevalde organet i fylkeskommunen, med fylkesordføraren som øvste politiske leiar. Fylkesrådmannen er den øvste administrative leiaren i fylkeskommunen. Sogn og Fjordane fylkeskommune er styrt etter formannskapsprinsippet. Fylkestinget er det øvste politiske organet, og det fungerer delvis gjennom fylkesutvalet, som svarar til formannskapet i kommunane. Fylkesutvalet førebur saker for og kjem med innstillingar til fylkestinget, men det har òg siste ord (delegert avgjerdsmynde) i ei rekke saker. Fylkestinget kjem saman om lag fire gonger i året, medan fylkesutvalet har møte om lag ein gong i månaden. Under fylkesutvalet igjen er Sogn og Fjordane fylkeskommune organisert i tre hovudutval, som har ansvar for desse fagområda:
- Samferdsle
- Opplæring
- Næring og kultur
Kontrollutvalet utøver kontroll og tilsyn med den fylkeskommunale forvaltninga på vegner av fylkestinget. Utvalet skal også sjå til at fylkeskommunen har ei forsvarleg revisjonsordning. |